Mae ap swyddogol Sioe Awyr Cymru bellach ar gael i’w lawrlwytho.

Bydd trefn yr arddangosiadau yn y sioe awyr yn cael ei lanlwytho i’r ap rai dyddiau cyn y digwyddiad am ddim a gynhelir yn Abertawe ddydd Sadwrn 1 Gorffennaf a dydd Sul 2 Gorffennaf.

Bydd yr ap hefyd yn cael ei ddiweddaru mewn amser go iawn i adlewyrchu newidiadau yn amserlen y digwyddiad a allai godi oherwydd y tywydd a ffactorau eraill.

Cyngor Abertawe sy’n gyfrifol am yr ap a’r sioe awyr, a Phrifysgol Abertawe yw’r noddwr allweddol eleni.

Ymysg yr awyrennau sydd wedi’u cadarnhau hyd yn hyn mae’r Red Arrows, tîm arddangos Typhoon, y Sea Vixen a Hediad Coffa Brwydr Prydain.

Mae’r ap, sy’n cael ei noddi gan Westy Bae Oxwich ac yn cynnwys talebau gostyngiadau, ar gael i’w lawrlwytho o’r App Store a Google Play am £1.99.

Bydd diweddariadau am ddim i bobl a brynodd yr ap ar gyfer sioe awyr y llynedd.

Meddai Frances Jenkins, Rheolwr Strategol Cyngor Abertawe dros Dwristiaeth, Marchnata a Digwyddiadau, “Defnyddiwyd yr ap dros 70,000 o weithiau yn ystod digwyddiad y llynedd felly mae’r poblogrwydd hwn, ynghyd â’r adborth cadarnhaol rydym wedi’i dderbyn, wedi ein hannog i’w ailgyflwyno ar gyfer Sioe Awyr Cymru 2017.

“Dyma’r unig le y gall pobl weld yr amserau arddangos, gyda diweddariadau am ddim i’r rheiny a brynodd yr ap y llynedd. Codir tâl i brynu’r ap am y tro cyntaf, ond mae hyn yn helpu i gefnogi’r ffrydiau incwm ar gyfer y digwyddiad i sicrhau ei fod yn gynaliadwy am flynyddoedd i ddod.

“Gyda chynigion arbennig gan fusnesau lleol a llawer o wybodaeth arall, bydd yr ap yn arweiniad cludadwy, defnyddiol dros ben i’r cannoedd ar filoedd o ymwelwyr rydym yn eu disgwyl eto yn y digwyddiad am ddim hwn sydd o safon ryngwladol.

“Bydd llawer o awyrennau eraill a manylion adloniant ar y tir yn cael eu cadarnhau dros yr wythnosau nesaf wrth i ni barhau i wneud cynnydd ar drefnu digwyddiad sy’n werth dros £1m i economi Abertawe.”

Mae’r ap hefyd yn cynnwys gwybodaeth am leoedd i aros, pethau i’w gwneud a lleoedd i fwyta ac yfed, yn ogystal â dolenni iddynt. Mae nodweddion eraill yn cynnwys bywgraffiadau’r timau arddangos.

Mae’r tîm arddangos wedi’i gadarnhau ar gyfer Sioe Awyr Cymru, a fydd yn cael ei chynnal ddydd Sadwrn 1 Gorffennaf a dydd Sul 2 Gorffennaf.

Yr awyr-lefftenant, Ryan Lawton, o RAF Coningsby fydd peilot arddangosfeydd y Typhoon eleni.

Yn ôl y ffigurau, mae Sioe Awyr Cymru, a drefnir gan Gyngor Abertawe, werth miliynau o bunnoedd i’r economi leol, gan helpu i ddenu cannoedd ar filoedd o ymwelwyr i lan y môr a nifer o leoliadau eraill ar draws y ddinas.

Prifysgol Abertawe fydd prif noddwr y digwyddiad eleni ac mae’r Red Arrows hefyd wedi cadarnhau y byddant yn cymryd rhan.

Meddai Frances Jenkins, Rheolwr Strategol Cyngor Abertawe ar gyfer Diwylliant, Twristiaeth, Marchnata a Digwyddiadau, “Mae’n bleser gennym gyhoeddi bod tîm arddangos rhagorol arall wedi cadarnhau y bydd yn cymryd rhan yn y Sioe Awyr yn ystod yr haf, gan sicrhau ein bod ni’n cyflawni’n nod o greu digwyddiad sy’n parhau i fodloni disgwyliadau pobl bob blwyddyn.

“Wrth i’r cyngor barhau i weithio ar drefniadau’r digwyddiad y tu ôl i’r llenni, gall preswylwyr ac ymwelwyr ddisgwyl mwy o berfformwyr yn cadarnhau eu lle dros yr wythnosau nesaf.

“Yn ogystal ag arddangosfeydd awyr, bydd adloniant ar y tir hefyd yn rhan o’r digwyddiad, a gaiff ei gynnal yr haf hwn am y drydedd flwyddyn yn olynol.”

Gydag uchafswm cyflymder o dros 1,300mya, mae’r Typhoon yn gallu cyrraedd uchder o 55,000 troedfedd. Mae’r awyren oddeutu 16 metr o hyd ac mae lled ei hadenydd yn mesur dros 11 metr.

Cynhelir y digwyddiad, sydd wedi’i drefnu gan Gyngor Abertawe, ddydd Sadwrn a dydd Sul, 1 a 2 Gorffennaf.

Cynhaliwyd y Sioe Awyr gyntaf yn 2007, a dyma fydd y drydedd flwyddyn yn olynol i Sioe Awyr Cymru gael ei chynnal yn Abertawe.

Y llynedd, roedd y digwyddiad hwn yn rhan o raglen ddigwyddiadau a gweithgareddau Joio Bae Abertawe, gan ddenu dros 200,000 o wylwyr. Yn ogystal â gwylio’r Sioe Awyr o’r promenâd, roedd llawer o bobl wedi’i gwylio o ganol y ddinas, yn y Mwmbwls ac mewn nifer o leoliadau eraill ar draws y ddinas.

Meddai’r Cyng. Robert Francis-Davies, Aelod Cabinet Cyngor Abertawe dros Fenter, Datblygu ac Adfywio, “Rydym yn falch o groesawu Prifysgol Abertawe fel prif noddwr Sioe Awyr Cymru ar gyfer 2017.

“Bu Prifysgol Abertawe’n rhan o’r Sioe Awyr yn y gorffennol, gan noddi’r Red Arrows yn y digwyddiad, felly mae ei chael hi fel prif noddwr Sioe Awyr Cymru 2017 yn cryfhau partneriaeth y digwyddiad sydd eisoes wedi’i sefydlu.

“Fel bob amser, ein nod yw gwneud Sioe Awyr Cymru mor llwyddiannus a chofiadwy â phosib i’r miloedd o bobl leol, ymwelwyr â’r ddinas a’n noddwyr.

“Yn 2015, dywedom y byddem yn gwneud popeth yn ein gallu i wneud y Sioe Awyr yn ddigwyddiad blynyddol yn Abertawe er budd preswylwyr a busnesau. Mae cynnal y Sioe Awyr am y drydedd flwyddyn yn olynol yn dangos ein hymrwymiad i gyflawni’r addewid honno.”

Meddai’r Athro Richard B. Davies, Is-ganghellor Prifysgol Abertawe, “Dylai rhanbarth Abertawe gyfan fod yn falch bod Prifysgol Abertawe wedi’i henwi y Brifysgol Orau yng Nghymru a Phrifysgol Cymru’r flwyddyn yng Nghanllaw Prifysgolion 2017 y Times a gyhoeddir gan bapurau newydd y Times a’r Sunday Times. Fel rhan o’n dathliadau, rydym yn falch o weithio mewn partneriaeth â’m ffrindiau yng Nghyngor Abertawe i gefnogi Sioe Awyr Cymru.

“Mae ein Hadran Peirianneg Awyrofod yn cael ei chydnabod fel un o’r 200 orau yn y byd a’r seithfed gorau yn y DU, gyda nifer o’n staff a’n myfyrwyr academaidd yn gweithio ar brosiectau gyda chwmnïau mawr megis Rolls Royce ac Airbus, yn ogystal â’r car Bloodhound a fydd yn debygol o dorri’r record cyflymder tir eleni. Rydym yn eich annog i ddod ac ymweld â’n cyfleusterau rhagorol sydd ar gynnig yng nghampws Singleton a’r Bae, ac rydym yn edrych ymlaen at groesawu darpar fyfyrwyr Prifysgol Abertawe i’n diwrnodau agored ar 17 Mehefin, 14 Hydref a 28 Hydref.

Roedd rhai o’r awyrennau a gymerodd ran yn Sioe Awyr Genedlaethol Cymru y llynedd yn cynnwys y Red Arrows, Hediad Coffa Brwydr Prydain a MiG Rwsiaidd o’r Rhyfel Oer. Bydd manylion yr awyrennau a fydd yn cymryd rhan yn nigwyddiad eleni’n cael eu cyhoeddi dros yr wythnosau nesaf.

Mae pecynnau cynnar ar gael o hyd i fusnesau a sefydliadau sydd am fod yn rhan o Sioe Awyr yr haf hwn. E-bostiwch mags.pullen@swansea.gov.uk am fwy o wybodaeth, neu ffoniwch 01792 635102.