Rydym yn gwybod bod ein holl ymwelwyr â Sioe Awyr Cymru’n mwynhau’r lleoliad anhygoel gymaint â ni, ac rydym yr un mor frwdfrydig ac ymrwymedig i sicrhau bod cyn lleied o effaith amgylcheddol o ganlyniad i’r digwyddiad ag sy’n bosib.
Rydym yn ymgynghori’n flynyddol ag amrywiaeth o grwpiau i gynllunio’r Sioe Awyr, gan gynnwys ein tîm ailgylchu mewnol, asiantaethau allanol ac eraill er mwyn ystyried cynifer o ffactorau â phosib, fel y gallwn gyflwyno digwyddiad pleserus a chynaliadwy.
Darllenwch ymlaen i ddarganfod y cynlluniau a’r mentrau a fydd ar waith er mwyn cadw’r Sioe Awyr mor wyrdd ac mor gynaliadwy â phosib;
Addewid hinsawdd
Abertawe wyrddach, sero-net erbyn 2050 – gwnewch addewid a chwaraewch eich rhan!
Llofnodom Siarter Cyngor Abertawe ar Weithredu ar yr Hinsawdd ym mis Rhagfyr 2020, sy’n ymrwymiad i weithredu ar newid yn yr hinsawdd, bioamrywiaeth a natur.
Mae ein partneriaid ar Fwrdd Gwasanaethau Cyhoeddus Abertawe ymhlith eraill wedi ymrwymo i Siarter Abertawe ar weithredu ar yr hinsawdd, sy’n nodi eu hymrwymiad nhw hefyd. Rhagor o wybodaeth.
Ailgylchu yn y Sioe Awyr
- Fel rhan o’r broses dendro, gofynnwyd i’r holl stondinau arlwyo ddefnyddio pecynnu ecogyfeillgar yn unig.
- Byddwn yn rhoi sachau ailgylchu i fasnachwyr, ynghyd â chyngor ar ddidoli gwastraff. Hefyd mae’r criwiau sbwriel yn patrolio’r stondinau drwy gydol y dydd ac yn casglu sachau ailgylchu, gan fynd â nhw’n ôl i fannau ailgylchu.
- Bydd 12 brif bwynt ailgylchu yn y sioe awyr wedi’u marcio â baneri ac arwyddion ailgylchu enfawr. Mae’r mannau ailgylchu ar hyd y prom a safleoedd y digwyddiad rhwng Brynmill Lane a’r Ganolfan Ddinesig.
- Bydd gwirfoddolwyr wrth law i’ch helpu i roi’r sbwriel yn y biniau cywir.
- Bydd casglwyr sbwriel yn patrolio ardal y prom a’r traeth drwy gydol y digwyddiad a bydd y sbwriel a gesglir yn cael ei ddidoli i’w ailgylchu.
Pweru’r digwyddiad
Eleni bydd ein cyflenwr ynni yn defnyddio tanwydd Green D+ (HVO) ar gyfer y generaduron. Mae’r cyflenwr yn gyflenwr pŵer digwyddiadau profiadol sydd wedi’i leoli yn Ne Cymru.
Beth yw Green D + HVO?
Biodanwydd adnewyddadwy y gellir ei ddefnyddio yn lle diesel yw Green D + HVO (olew llysiau wedi’i drin â hydrogen), ac fe’i wnaed i safon EN15940. Dyma’r tanwydd â’r allyriadau isaf sydd ar gael i’w ddefnyddio yn lle diesel.
O beth y mae Green D + HVO wedi’i wneud?
Gwneir GD+ yn gyfan gwbl o wastraff ac fe’i diffinnir fel adnewyddadwy a chynaliadwy (RED11). Biodanwydd adnewyddadwy a chynaliadwy sy’n deillio o wastraff a gweddillion olew yw Green D+. Mae’n ddewis amgen i danwydd diesel a biodiesel (ester methyl asid brasterog). HVO ydyw’n bennaf, sef olew llysiau wedi’i drin â hydrogen, sydd wedi’i wella gyda system ychwanegion priodol.
Refill a gorsafoedd dŵr
Rydym yn ymrwymedig i leihau gwastraff plastig cymaint â phosib, a bydd gennym 3 gorsaf dŵr yn y digwyddiad er mwyn i chi lenwi’ch poteli â dŵr am ddim. Maent wedi’u lleoli yn y mannau canlynol:
- y Ganolfan Ddinesig (ardal laswelltog)
- Ger y Senotaff
- Mynedfa i’r traeth gyferbyn â gwaelod Brynmill Lane
Bydd y gorsafoedd dŵr hyn wedi’u nodi’n glir.
Gallwch hefyd ddod o hyd i leoliadau ein gorsafoedd dŵr (ac eraill yn yr ardal leol) trwy lawrlwytho ap Refill am ddim.
Ymgyrch arobryn yw Refill, a ddyluniwyd i’ch helpu i leihau eich llygredd plastig trwy ei wneud yn hawdd i ail-lenwi’ch potel ddŵr ailddefnyddiadwy yn lle prynu potel blastig. Darganfyddwch ragor am eu menter wych yma.
Masnach Deg a chynnyrch lleol
Mae’r broses dendro ar gyfer arlwywyr yn rhoi blaenoriaeth i’r masnachwyr sy’n defnyddio cynnyrch Masnach Deg a chynnyrch lleol/Cymreig lle bynnag y bo modd. Mae’r cwmni arlwyo llwyddiannus wedi’i leoli yn Ne Cymru ac mae ganddo ymagwedd cydgysylltiedig at rannu pŵer a dosbarthu bwyd, gan ddefnyddio cyflenwyr lleol lle bynnag y bo modd.
TRAFFIG A PHARCIO
Mae cynllun rheoli traffig y digwyddiad yn annog pobl i ddefnyddio’r safleoedd parcio a theithio, rhannu ceir neu ddefnyddio dulliau eraill o gludiant lle bynnag y bo modd.
PLANNU COED
Mae’r cyngor yn plannu coed a llwyni ychwanegol ar draws y ddinas.
AWYRENNAU MILWROL
Mae’r awyrennau milwrol sy’n cymryd rhan yn yr arddangosiad yn gwneud hynny fel rhan o’u hyfforddiant arferol, oherwydd bod rhaid i beilotiaid gwblhau nifer penodol o oriau hedfan bob blwyddyn.
Amcanion Cynaliadwy Contractwr y Digwyddiad
Caiff holl gyflenwyr y digwyddiad eu sgorio yn eu tendrau yn ôl eu hamcanion cynaliadwy a sut y gallant ddiwallu’n hamcanion ni.
Yn 2019, datganodd Cyngor Abertawe argyfwng hinsawdd, a dilynwyd hyn gan gynllun gweithredu i leihau ein hallyriadau sefydliadol, adolygiad polisi i sicrhau ein bod yn mynd i’r afael â newid yn yr hinsawdd fel rhan o bopeth y mae’r cyngor yn ei wneud, a chynlluniau ar gyfer ymgysylltu â phartneriaid a dinasyddion a gweithio gyda nhw.
Er mwyn dangos ymrwymiad Cyngor Abertawe i Fod yn Abertawe Sero-Net o ran carbon, cymeradwywyd Siarter Newid yn yr Hinsawdd Cyngor Abertawe yn ystod cyfarfod y cyngor ar 3 Rhagfyr 2020.
Mae’r Siarter yn nodi ein hymrwymiad i weithio tuag at ddod yn sefydliad Sero-Net o ran carbon trwy wneud y canlynol:
- Ymrwymo i weithio tuag at ddod yn sefydliad Sero-Net o ran carbon erbyn 2030
- Cymryd camau i ateb her yr argyfwng hinsawdd
- Gweithio ar y cyd â phartneriaid i ddatblygu strategaeth
- Cynnwys rhanddeiliad gan gynnwys plant a phobl ifanc mewn trafodaethau i feithrin ymddiriedaeth.
Gellir dod o hyd i ragor o fanylion am Gynllun Hinsawdd a pholisïau Cyngor Abertawe yma
Mae egwyddorion Amgylcheddol a Chynaliadwy ein rhaglen Digwyddiadau fel a ganlyn:-
- Rhoi gwerth go iawn i’r gymuned leol ac ehangach
- Lleihau allyriadau carbon* a chaffael datrysiadau carbon isel
- Mwyafu effeithlonrwydd ynni a’r gyfran o ynni o ffynonellau adnewyddadwy
- Mwyafu effeithlonrwydd dŵr a lleihau effaith dŵr gwastraff a charthffosiaeth
- Osgoi deunyddiau untro a lleihau gwastraff drwy fabwysiadu’r hierarchaeth gwastraff – atal, ailddefnyddio, ailgylchu, adfer, gwaredu
- Defnyddio a hyrwyddo dulliau cynaliadwy o gludiant*
- Mabwysiadu dull caffael cynaliadwy i sicrhau’r gwerth gorau am arian ar sail oes gyfan drwy gefnogi cadwyni cyflenwi/contractwyr lleol, gan ddefnyddio nwyddau carbon isel, cynaliadwy a moesegol (h.y. Pren ardystiedig FSC, paentiau a gludiau VOC sero neu isel) i leihau carbon a’r defnydd o adnoddau naturiol a chefnogi masnachu teg
- Annog cyflenwyr a chontractwyr i weithio i gynnal y gwerthoedd a fynegir
Byddem hefyd yn eich annog i adolygu ac amlinellu eich arferion a sut maent yn cyd-fynd â’r amcanion hyn.
* Mae Equilibrium wedi rhyddhau ap y gellir ei lawrlwytho am ddim sydd wedi’i gynllunio i ganiatáu i bawb sy’n gweithio mewn digwyddiadau byw fesur eu hallyriadau carbon o ganlyniad i gludiant yn gyfleus. Mae’r ap hefyd yn caniatáu i ddefnyddwyr fodelu teithio carbon is ac yn rhoi cyngor ar sut i leihau ôl-troed carbon teithio a sut i weithredu drwy fuddsoddi mewn datrysiadau sy’n well i’r hinsawdd.
