Mae Abertawe’n paratoi ar gyfer penwythnos gwefreiddiol wrth i Sioe Awyr Cymru ddychwelyd i Fae Abertawe ar 5 a 6 Gorffennaf. Bydd trefnwyr y digwyddiad, Cyngor Abertawe, yn parhau i sicrhau hygyrchedd i bawb sy’n dod, yn enwedig unigolion ag anghenion hygyrchedd. Bydd ardal wylio a chyfleusterau pwrpasol ar gael unwaith eto er mwyn atgyfnerthu profiad pawb sy’n dod i Sioe Awyr Cymru.

Mae cangen Abertawe o Gymdeithas Genedlaethol Awtistiaeth yn falch o gefnogi Sioe Awyr Cymru eto eleni drwy ddarparu gwirfoddolwyr i gefnogi pobl sy’n defnyddio’r ardaloedd gwylio hygyrch. Er bod yr ardaloedd hyn ar gael i unrhyw un ag anghenion ychwanegol, mae sawl teulu sy’n gysylltiedig â Chymdeithas Genedlaethol Awtistiaeth yn defnyddio’r ardal wylio hygyrch ac yn ei chanmol.

Meddai aelod o Gymdeithas Genedlaethol Awtistiaeth, “Heb yr ardaloedd hygyrch, ni fyddem yn gallu dod i wylio’r Sioe Awyr – mae gwybod bod ardal bwrpasol ar gyfer unrhyw un ag unrhyw fath o angen hygyrchedd yn cynnig cysur go iawn, ac mae’n golygu y gallwn fwynhau’r sioe gyda’n gilydd fel teulu. Mae gwybod bod gwirfoddolwyr ystyriol yno’n rhyddhad mawr i ni, rhag ofn y bydd angen eu help arnom.”

Meddai’r Cynghorydd Robert Francis-Davies, Aelod Cabinet Cyngor Abertawe dros Fuddsoddi, Adfywio, Digwyddiadau a Thwristiaeth, “Rydym yn ymrwymedig i wneud Sioe Awyr Cymru’n brofiad pleserus i bawb. Bydd yr ardal wylio ddynodedig a’r gwasanaethau cymorth gan sefydliadau fel Cymdeithas Genedlaethol Awtistiaeth yn helpu i sicrhau y gall pawb ymuno yng nghyffro’r digwyddiad hwn.”

Yn ogystal â’r ardaloedd gwylio dynodedig yn y senotaff a’r safle dinesig, bydd Sioe Awyr Cymru’n darparu cyfleusterau hygyrch, gan gynnwys toiledau hygyrch a chymorth gan wirfoddolwyr hyfforddedig drwy gydol y digwyddiad.

Bydd Sioe Awyr Cymru’n ddigwyddiad bythgofiadwy, gan gynnig perfformiadau penigamp gan dimau awyr o fri.

​​​​​​​Bydd tîm Red Arrows byd enwog yr RAF yn dychwelyd i Abertawe i ddiddanu’r dorf yn Sioe Awyr Cymru’r haf hwn.

Dyma’r enw mawr cyntaf a gadarnhawyd ar gyfer y digwyddiad deuddydd nodedig am ddim a gynhelir ym Mae Abertawe ddydd Sadwrn 5 Gorffennaf a dydd Sul 6 Gorffennaf. Mae’r sioe flynyddol dros forlin 4 milltir y bae, a drefnir gan Gyngor Abertawe, yn denu mwy na 200,000 o breswylwyr ac ymwelwyr o bob cwr o Gymru a’r DU.

Bydd y Red Arrows, sy’n enwog am arddangosiadau awyr gwefreiddiol a hedfan manwl gywir, yn perfformio ar y ddau ddiwrnod eleni, gan roi cyfle i gefnogwyr weld trefniannau nodweddiadol, symudiadau brawychus ac olion mwg coch, gwyn a glas disglair.

Ar y tir, bydd ymwelwyr yn cael mwynhau amrywiaeth o opsiynau adloniant, gan gynnwys stondinau masnach, bwyd a diod blasus, cerddoriaeth fyw a gweithgareddau difyr i bobl o bob oedran. Bydd yn benwythnos llawn cyffro i deuluoedd, y rhai hynny sy’n dwlu ar awyrennau a thwristiaid fel ei gilydd.

Meddai’r Cynghorydd Robert Francis-Davies, Aelod Cabinet Cyngor Abertawe dros Fuddsoddi, Adfywio, Digwyddiadau a Thwristiaeth, “Mae’n anhygoel bod y Red Arrows yn dychwelyd eto, ac mae’n wych y bydd y tîm yn perfformio ar ddau ddiwrnod Sioe Awyr Genedlaethol Cymru 2025. Rydym yn gwybod y bydd ymwelwyr mor falch o weld yr arddangosiadau hyn ag erioed. Mae’r digwyddiad hwn yn un o uchafbwyntiau calendr haf Abertawe, ac rydym yn disgwyl y bydd yn hynod boblogaidd eto eleni.”

Yn ogystal â’r Red Arrows, cyhoeddir mwy o arddangosiadau awyr gwefreiddiol ac atyniadau ar y tir dros yr wythnosau nesaf. Dros y blynyddoedd blaenorol, mae’r rhain wedi cynnwys awyrennau eiconig megis Hediad Coffa Brwydr Prydain, Typhoon y Llu Awyr Brenhinol, ac amrywiaeth o dimau erobateg rhyngwladol.