Roedd penwythnos Sioe Awyr Cymru’n un gwych gyda channoedd o filoedd o bobl yn mwynhau digwyddiad awyr agored am ddim mwyaf y wlad.

Cafodd ymwelwyr o bob rhan o’r DU eu difyrru gan arddangosiadau’r Red Arrows, Hediad Coffa Brwydr Prydain, Typhoon yr Awyrlu Brenhinol ac eraill dros ddeuddydd y sioe awyr.

Roedd torfeydd enfawr wedi mwynhau amrywiaeth eang o arddangosfeydd rhyngweithiol, gweithgareddau ac adloniant byw ar y ddaear yn ogystal â gweld y cyffro yn yr awyr yn y digwyddiad a drefnwyd gan Cyngor Abertawe.

Ymhlith y nodweddion, ac yn newydd ar gyfer 2025, roedd grŵp plymio sgwadron y Llynges Frenhinol, gyda’i arddangosfa tanc plymio gyffrous, a gynigiodd gipolwg prin i ymwelwyr ar fyd beiddgar plymwyr clirio ffrwydron.

Meddai’r Cyng. Robert Francis-Davies, Aelod Cabinet Cyngor Abertawe dros Fuddsoddi, Adfywio, Digwyddiadau a Thwristiaeth, “Fel un o uchafbwyntiau calendr digwyddiadau blynyddol Abertawe, roedd y sioe awyr yn llwyddiant ysgubol, gan barhau i gefnogi enw da’r ddinas fel cyrchfan o’r radd flaenaf ar gyfer digwyddiadau mawr.

“Roedd sêr y sioe mynediad am ddim yn cynnwys y cannoedd o filoedd o ymwelwyr a fwynhaodd ddiwrnod allan neu benwythnos yn Abertawe. Arweiniodd yr awyrgylch teuluol at benwythnos gwych, ac ni ddifethwyd hwyliau pobl gan y glaw.

“Mae’r sioe awyr yn cyfrannu miliynau o bunnoedd at yr economi leol, ac rydym yn diolch i fusnesau a phreswylwyr lleol am eu hamynedd gyda’r ffyrdd a oedd ar gau, ac i’r holl fasnachwyr am eu cyfraniad at lwyddiant y sioe ddiweddaraf.

“Rydym hefyd yn gwerthfawrogi dealltwriaeth y rheini yr effeithiwyd ar eu trefniadau dyddiol gan y newidiadau ffyrdd a roddwyd ar waith er diogelwch pawb.”

Mae Cyngor Abertawe’n estyn eu diolch i bawb a ddaeth i’r Sioe Awyr, yn ogystal â staff y cyngor, y gwasanaethau brys, noddwyr y sioe a phartneriaid eraill y cyngor a helpodd i wneud y digwyddiad yn arddangosfa o’r radd flaenaf ar gyfer y ddinas.

Mae ystod eang o ddigwyddiadau o’r safon uchaf yn cael eu cynnal eleni yn Abertawe, a chroesewir IRONMAN 70.3 Abertawe unwaith eto i’r ddinas ar 13 Gorffennaf.

Mae rhagor o wybodaeth am haf gwych o ddigwyddiadau yn Abertawe ar gael yn: www.croesobaeabertawe.com 

Mae Sioe Awyr Cymru – sy’n para am ddeuddydd ac sy’n cael ei threfnu gan eich cyngor – yn dychwelyd!

Meddai Pennaeth y Gwasanaethau Diwylliannol, Tracey McNulty, “Bydd degau ar filoedd o bobl yn dod i’r sioe nodedig hon – bydd llawer i’w fwynhau.

“Rydym yn diolch i’r rheini a fydd yn gorfod newid eu trefn ddyddiol o bosib oherwydd y newidiadau i’r ffyrdd a fydd ar waith er diogelwch pawb. Rydym hefyd yn diolch i’n noddwyr a’n cefnogwyr.”

Bydd y nodweddion ychwanegol eleni’n cynnwys Pentref y Cyn-filwyr, er mwyn anrhydeddu cyn-aelodau’r lluoedd arfog.

Dewch i weld y Red Arrows, os yw’n bosib. Byddant yn hedfan dros Abertawe am 5.15pm nos Sadwrn.

Dros y penwythnos, bydd Typhoon yr Awyrlu Brenhinol hefyd yn dychwelyd ar y ddau ddiwrnod, yn ogystal â hofrennydd Wildcat Black Cats y Llynges Frenhinol.

Ceir ymddangosiadau hefyd gan Team Raven, sy’n arbenigo mewn erobateg, y Vampire o Norwy a Thîm Parasiwt Red Devils byd-enwog y Fyddin – yn ogystal ag awyren ddwbl Fairey Swordfish, hofrennydd Westland Wasp, Rolls-Royce Spitfire (dydd Sul yn unig), Yak50, Tîm Erobateg Starlings, tîm arddangos hofrenyddion Sgwadron Gazelle, hofrennydd Sea King a thîm erobateg Firebirds.

Bydd arddangosiadau ar y ddaear i’r holl deulu, gan gynnwys replicâu o Hurricane a Typhoon, arddangosiadau milwrol, bwyd a diod, adloniant byw, ffair bleser, hen gerbydau milwrol, amgueddfa D-Day symudol, stondinau masnach, y Parth Modurol i’r rhai hynny sy’n dwlu ar geir – ac ardal hwyl newydd i’r teulu.

Bydd efelychwyr hedfan, band Tywysog Cymru, cerbydau ymladd mawr a Phentref y Cyn-filwyr.

Mae modd cadw lle ymlaen llaw mewn mannau parcio dynodedig o hyd, bydd cyfleusterau parcio a theithio ar gael yn Stiwdios y Bae a safle parcio a theithio Glandŵr y cyngor, a gallwch deithio i’r sioe ar y trên a’r bws.

Mae ap swyddogol Sioe Awyr Cymru’n cynnig mynediad at amserlen swyddogol o arddangosiadau, newyddion byw, bywgraffiadau am awyrennau a mwy. Mae ar gael ar ddyfeisiau Android ac Apple am ffi untro o £1.99; gellir ei lawrlwytho eto am ddim os ydych wedi ei brynu o’r blaen.

Mae trefnwyr a phartneriaid yn cymryd nifer o gamau i leihau effaith amgylcheddol y digwyddiad. Mae’r rhain yn cynnwys mwy o fannau ailgylchu nag erioed o’r blaen a thair gorsaf ail-lenwi dŵr.

Bydd bandiau arddwrn am ddim i ddiogelu plant rhag mynd ar goll ar gael o fannau gwybodaeth y sioe awyr, staff meysydd parcio, cadetiaid a stiwardiaid ar hyd y promenâd, ac o stondinau’r heddlu a’r gwasanaeth tân yn y Senotaff.

Bydd gweithwyr Ambiwlans Sant Ioan ar gael mewn mannau cymorth cyntaf.

Mae’r noddwyr a’r cefnogwyr yn cynnwys Aerodyne, Day’s Rental, First Cymru, FRF DS Swansea, FRF Toyota, Great Western Railway, Lidl, Radnor Hills, y Lleng Brydeinig Frenhinol, Trafnidiaeth Cymru, Travel House a Greatest Hits Radio.