Bydd noson unigryw, llawn cerddoriaeth, gweithgarwch a chyffro yn trawsnewid yr awyr uwchben Abertawe’r mis Gorffennaf hwn.

Am y tro cyntaf erioed, bydd balwnau aer poeth a thimau erobatig sy’n hedfan gyda’r hwyr yn perfformio uwchben Abertawe fel rhan o benwythnos Sioe Awyr Cymru.

Trefnir y digwyddiad arbennig, a gynhelir o 8.30pm ar 6 Gorffennaf ac a fydd hefyd yn cynnwys cerddoriaeth o 1969, i helpu i ddathlu pen-blwydd y ddinas yn 50 oed a disgwylir i’r sioe fod yn gyffrous iawn.

Meddai’r Cynghorydd Robert Francis-Davies, Aelod y Cabinet dros Fuddsoddi, Adfywio a Thwristiaeth, fod Sioe Awyr Cymru eisoes yn un o brif ddigwyddiadau am ddim y DU ond eleni roeddem am wneud rhywbeth ychwanegol i nodi pen-blwydd y ddinas yn 50 oed.

Meddai, “Prif ddiben Sioe Awyr Cymru yw bod yn drawiadol ac rydym yn gwybod bod y torfeydd enfawr y mae’n eu denu wir yn gwerthfawrogi’r arddangosiadau awyr a’r digwyddiadau ar y ddaear sef prif ran y digwyddiad.

“Rydym ymhlith cefnogwyr mwyaf ymroddedig y Red Arrows a dyna’r rheswm pam gwnaethant yn siŵr ein bod ni ar eu rhaglen ar gyfer yr haf dros ddeuddydd y digwyddiad.

“Ond mae’r digwyddiad ‘gyda’r hwyr’ yn addo ychwanegu rhywbeth arbennig iawn i ymwelwyr ei fwynhau gyda’r hwyr. Bydd unrhyw un sydd wedi gweld balwnau aer poeth gyda’r hwyr yn gwybod pa mor anhygoel yw eu gweld.

“Caiff y balwnau aer poeth eu gosod a’u clymu ar hyd traeth Abertawe a bydd tîm arddangos Fireflies hefyd yn perfformio – dwy awyren arddangos yw’r rhain sydd â thân gwyllt yn saethu oddi ar eu hadenydd – gan gyflwyno sioe stỳnt gyda’r hwyr.

“Trefnir hefyd i dîm arddangos parasiwt y Tigers berfformio naid gyda’r hwyr, dyma un o’n perfformwyr cyson yn Sioe Awyr Cymru.”

Ar y ddaear, bydd cerddoriaeth fyw a fydd yn peri i bobl hiraethu am y 60au hwyr, gan ddathlu rhai o’r caneuon a gyrhaeddodd frig y siartiau yn y flwyddyn pan ddynodwyd Abertawe’n ddinas am y tro cyntaf.

Meddai’r Cyng. Francis-Davies, “Mae Abertawe 50 yn ddathliad o orffennol, presennol a dyfodol ein dinas a chynhelir Sioe Awyr Cymru lai nag wythnos ar ôl dyddiad swyddogol yr hanner canmlwyddiant, sef 3 Gorffennaf.

“Mae Sioe Awyr Cymru wedi dod yn rhan o hanes a threftadaeth fodern ein dinas, gan ddenu tua 250,000 o ymwelwyr i’r traeth yn ystod deuddydd y digwyddiad. Roeddem am wneud rhywbeth arbennig ar gyfer yr hanner canmlwyddiant a dyna beth yw pwrpas y rhan ‘gyda’r hwyr’ o’r Sioe Awyr.”

Dyma un yn unig o lawer o ddigwyddiadau a gynlluniwyd drwy gydol y flwyddyn i nodi hanner canmlwyddiant Abertawe. Rydym yn gofyn hefyd i breswylwyr a busnesau gymryd rhan drwy feddwl am eu digwyddiadau a’u syniadau eu hunain i ddathlu’r garreg filltir unigryw. I gael gwybodaeth am sut gallwch fod yn rhan o Abertawe 50, ewch i www.swansea50.co.uk/?lang=cy

Bydd tair awyren eiconig o’r Ail Ryfel Byd yn dod â hanes yn fyw yr haf hwn yn Sioe Awyr Cymru.

Fel rhan o’r dathliadau sy’n nodi hanner canmlwyddiant Abertawe fel dinas, bydd Hediad Coffa Brwydr Prydain yn arddangos tair o lond llaw o awyrennau sy’n parhau i gael eu hedfan mwy na 70 o flynyddoedd ers y rhyfel.

Bydd y Supermarine Spitfire, yr Hawker Hurricane a’r Avro Lancaster yn gadael eu marc ar Sioe Awyr Cymru ar 6 a 7 Gorffennaf o flaen torfeydd enfawr.

Mae’r digwyddiad am ddim a gynhelir gan Gyngor Abertawe eisoes wedi cyhoeddi y bydd Red Arrows yr Awyrlu Brenhinol yn rhan o’r rhestr o ddigwyddiadau.

Meddai Robert Francis-Davies, Aelod Cabinet y Cyngor dros Fuddsoddi, Adfywio a Thwristiaeth, “Gellir dadlau mai Hediad Coffa Brwydr Prydain yw’r arddangosfa fwyaf hanesyddol ac atgofus yn hanes Prydain.

“Mae gweld yr awyrennau hyn yn cael eu hedfan yn ffordd o ddod â hanes yn fyw ac wrth ddathlu 50 mlynedd ers ein hurddo fel dinas, rydym yn falch o’u croesawu yma yn Abertawe.”

Meddai David Bailey, Rheolwr Gwasanaethau Cwsmeriaid cwmni rheilffordd GWR, partner rheilffordd swyddogol Sioe Awyr Cymru, “Bydd Rheilffordd y Great Western yn helpu i ddenu mwy o bobl nag erioed i Abertawe eleni gyda’n trenau Intercity Express yn darparu bron chwarter yn fwy o gadeiriau ar bob gwasanaeth na’r trenau a ddisodlwyd ganddynt.

“Mae GWR yn falch o noddi Hediad Coffa Brwydr Prydain yn Sioe Awyr Cymru eleni.”

Bydd tîm erobatig o’r radd flaenaf y Red Arrows yn dychwelyd i Abertawe ar gyfer Sioe Awyr Cymru’r haf hwn.

Bydd y Red Arrows yn hedfan ar ddau ddiwrnod y digwyddiad am ddim hwn gan Gyngor Abertawe a gynhelir ddydd Sadwrn 6 Gorffennaf a dydd Sul 7 Gorffennaf.

Mae’r Red Arrows, a elwir yn Dîm Erobatig y Llu Awyr Brenhinol yn swyddogol, wedi perfformio dros 4,900 o arddangosiadau mewn dros 60 o wledydd ar draws y byd ers y 1960au.

Meddai Robert Francis-Davies, Aelod Cabinet y Cyngor dros Fuddsoddi, Adfywio a Thwristiaeth, “Mae hi’n newyddion gwych bod y Red Arrows wedi cadarnhau y byddant yn cymryd rhan yn Sioe Awyr Genedlaethol Cymru’r haf hwn.

“Bydd yn bleser croesawu’n ôl dîm ag enw rhyngwladol mor dda, yn enwedig ar gyfer y flwyddyn arbennig hon, wrth i Abertawe dathlu 50 mlynedd fel dinas.” Dengys y ffigyrau fod Sioe Awyr Cymru, a drefnir gan Gyngor Abertawe, wedi denu 250,000 o bobl y llynedd ac amcangyfrifwyd ei bod yn werth tua £9.7 miliwn i’r economi leol.

Get the Official APP!

Caiff amserlen ddynamig o amserau arddangos ei hychwanegu at ap Sioe Awyr Cymru ychydig ddiwrnodau cyn y digwyddiad am ddim.

Mae’r ap ar gael ar yr Appstore a Google Play. Bydd yr ap hefyd yn cael ei ddiweddaru mewn amser go iawn i adlewyrchu newidiadau yn amserlen y digwyddiad a allai godi oherwydd y tywydd a ffactorau eraill.

Bydd y cynnwys yn ymddangos wrth i bob perffomiwr newydd gael ei gyhoeddi a bydd yr amserlen ar gael ddydd Mercher 3 Gorffennaf.