Darparodd Sioe Awyr Cymru 2017 benwythnos anhygoel arall o acrobateg awyrol gan dorri record arall!

Daeth y torfeydd mwyaf erioed hyd yn hyn i Abertawe dros benwythnos 1 a 2 Gorffennaf 2017 ar gyfer Sioe Awyr Cymru lle cafwyd penwythnos gwych i’r teulu. Er gwaethaf y glaw ar y dydd Gwener, daeth y tywydd braf mewn pryd ar gyfer y penwythnos gyda’r haul yn gwenu ar y dydd Sadwrn. Gyda’r Sioe Awyr yn fwyfwy poblogaidd bob blwyddyn, daeth torfeydd mawr i Fae Abertawe i baratoi am y diwrnod o’u blaenau a mwynhau’r arddangosfeydd gwych ar y ddaear neu’r haul ar y traeth.

Bu Tîm Raven, perfformwyr awyr beiddgar o Abertawe, yn cychwyn y cyffro ar y dydd Sadwrn gan syfrdanu’r torfeydd a’u paratoi ar gyfer y penwythnos gwych o’u blaenau. Roedd y diwrnod yn llawn cyffro, a gwelwyd arddangosiadau hen a newydd gan gynnwys Autogyro, Pitts Special, y Bristol Blenheim, Awyren Tutor yr RAF, Strikemaster a mwy. Roedd amser hyd yn oed i Dîm Arddangos Cwymp Rhydd y Tigers alw heibio, i Typhoon yr RAF greu sŵn ac i Hediad Coffa Brwydr Prydain arddangos y Spitfire a’r Hurricane eiconig. Ac wrth gwrs, pwy allai anghofio Red Arrows yr RAF?

Roedd y tywydd yn well byth ar y dydd Sul, a chyda rhestr o berfformwyr a oedd yn cynnwys y Chinook, bu’r torfeydd yn mwynhau diwrnod gwell yn y Sioe Awyr na’r diwrnod cynt! Gyda llai o gymylau, roedd y Red Arrows yn gallu perfformio’r arddangosfa uchel yn y cymylau i’w potensial llawn, gan greu golygfeydd anhygoel dros Fae Abertawe a rhai cyfleoedd gwych i dynnu lluniau.

Erbyn y diwedd roedd torfeydd enfawr wedi mwynhau’r arddangosfeydd, gyda 250,000 o bobl yn gwylio Sioe Awyr Cymru 2017. Diolch i bawb a ddaeth i wylio a llongyfarchiadau i chi i gyd – rydych chi wedi torri record!

Byddwn yn dychwelyd yn 2018 gyda phenwythnos arall a fydd yn llawn cyffro yn yr awyr uwchben Bae Abertawe, gan obeithio torri record unwaith eto! Tan hynny, gallwch gael yr holl newyddion diweddaraf am Sioe Awyr Cymru drwy ein dilyn ar gyfryngau cymdeithasol neu gofrestru ar gyfer ein rhestr bostio.

Welwn ni chi yn 2018!

Gallwch wylio Sioe Awyr Genedlaethol Cymru 2016 mewn steil bellach gyda phecynnau VIP!

Mae’n bleser gan Dragon Events gynnig cyfle VIP unigryw i edmygu’r arddangosiadau hedfan ac mewn lleoliad sy’n agos at yr arddangosiadau ar y ddaear.

Mwynhewch eich diwrnod mewn steil VIP go iawn o’r babell fawr foethus gyda’r golygfeydd gorau o Fae Abertawe!

– Detholiad o deisennau crwst Danaidd a the/choffi wrth gyrraedd
– te a choffi am ddim ar gael trwy’r dydd
– bar tâl â staff (gydag opsiynau i archebu gwin/siampên ymlaen llaw i’ch bord)
– cyfleusterau toiled unigryw
– mae patio a dodrefn rattan yn yr ardd breifat i wylio’r hediadau yn yr awyr agored
– Gweinir cinio rhwng 12pm a 2pm
– bordydd pwrpasol i 10 ag enw corfforaethol/enw’r cwmni arnynt
– gweinydd personol

Bwydlen 2016

Prynu tocynnau yma

Cerddwyr adenydd beiddgar wedi’u cadarnhau ar gyfer Sioe Awyr Genedlaethol Cymru

Bydd cerddwyr adenydd beiddgar yn perfformio yn yr awyr uwchben Bae Abertawe’r haf hwn.

Mae Cyngor Abertawe bellach wedi cadarnhau bod y Breitling Wingwalkers, sy’n enwog ar draws y byd, wedi cael eu hychwanegu at y rhestr o berfformwyr yn Sioe Awyr Genedlaethol Cymru a gynhelir ddydd Sadwrn, 2 Gorffennaf a dydd Sul, 3 Gorffennaf.

Mae tîm Breitling Wingwalkers yn defnyddio awyrennau dwbl Boeing Stearman o’r 1940au sy’n rhuo drwy’r awyr ar gyflymder o hyd at 150mya.  Pan fydd yr awyrennau’n hedfan, bydd y cerddwyr adenydd yn perfformio llawsafiadau ac yn dringo o gwmpas yr awyren yn erbyn pwysau’r gwynt, gan godi llaw ar y dorf ar y ddaear ar yr un pryd.

Mae’r tîm wedi perfformio ym mhedwar ban byd, mewn gwledydd sy’n cynnwys Tsieina, India, Awstralia a’r Emiraethau Arabaidd Unedig.

Meddai’r Cyng. Robert Francis-Davies, Aelod Cabinet Cyngor Abertawe dros Fenter, Datblygu ac Adfywio, “Mae’r rhestr o berfformwyr ar gyfer sioe awyr yr haf hwn yn dechrau cynyddu bellach. Mae’r Breitling Wingwalkers yn hynod boblogaidd gyda phobl sy’n dwlu ar erobateg, felly mae eu hychwanegu at sioe awyr mis Gorffennaf yn hwb arall i ddigwyddiad a fydd yn un cofiadwy.

“Mae Sioe Awyr Genedlaethol Cymru’n rhoi adloniant o safon am ddim i bobl leol yn eu dinas eu hunain, ac mae hefyd yn denu cannoedd ar filoedd o ymwelwyr, gan helpu i hybu ein siopau, ein tafarndai, ein gwestai a busnesau eraill.

“Mae’r digwyddiad yn un o brif uchafbwyntiau rhaglen digwyddiadau a gweithgareddau Joio Bae Abertawe, sy’n cynnig rhywbeth at ddant pawb yr haf hwn ac yn y dyfodol.”